Gesjiedenis de Bosuulkes
Gesjiedenis vanne jeugdcarnavalsvereniging De Bosuulkes.
We sjrieve ‘t karnavals sezoen 1973-1974.

Oprichting Jeugdraod Nunûm.
 
Veer jong gaste‚ te weite: Harrie van Koolwijk‚ Har Coenen‚ Leon Gommans en Jos Coenen zitte ein plan op väör ‘t oprichte van eine jeugdraod in Nunûm. Drek waertj de jeugd van Nunûm benaderdj of d´r interesse besjteit väör de jeugdraod. Dit levertj gein probleme op‚ 11 jonges zigke sjpontaan "jao". As twiëdje sjtap waertj‚ toenmalig Vorst van CV De Bosuule‚ Jacq Bongaerts van ´t idee op de huegdje gebrach. Hae reageertj positief op ´t idee vanne jeugdraod in Nunûm. Van dees gelaegenheid waertj geliek gebroek gemaaktj om ‘ne claim te ligke oppe mantjels van de groeate Raod‚ omdet die net nuje haje aangesjaftj. Hiej mit waertj toegesjtumdj‚ allein as ´t raegentj mitte optocht motte ze truuk nao de groeate Raod‚ omdet de nuuj mantjels neet naat moge waere. Alle väörbereijinge zeen getroffe‚ ´t sjpel kan beginne…….

Aktieve deilname aan ´t Karnavalsgebäöre.
 
Naodet de väörbereijinge ware aafgesjlaote waerdje alle jonges die positief haje gereageerdj biej ein gerope. Tiedes dees vergadering moste diverse zake waere aafgehanjeldj:´t keze van eine jeugdprins‚ ´t benömme van de jeugdvorst en ´t installere vanne jeugdraod. Mit volledige insjtumming van de aanwezige leje waertj Harrie van Koolwijk toet iërste Jeugdprins van Nunûm gekaoze: Jeugdprins Har I. Leon Gommans waertj benömdj toet Jeugdvorst. De iërste Jeugdraod besjteit oet: H.Coenen‚ J.Coenen‚ Fr Vullers‚ L.Linssen‚ J.Franssen‚ W.Caris‚ H.Janssen‚ S.Smeets‚ H.Joosten. F.Gijsen‚ H.Aelmans‚ A.Gijsen en J.Reinders. Jeugdprins Har I waertj op karnavalszaoterdig ane Nunûmse bevolking väörgesjtildj. De aovendj waas ein groeat sukses. Boete det hiël Nunûm waas oetgeloupe‚ waas ouch de Groeate Raod aanwezig. Omdet ´t sjpraeke in ´t aopebaar neet väör ederein is weggelag‚ fungeerdje Peter Adams as souffleur. Nemes is det eigelik oeats opgevalle. De optocht det jaor verleep ouch prima‚ ´t raegendje neet‚ zoeadet de Jeugdraod zich kos presentere in sjoean mantjels!! De kiem väor de karnaval waas gelag‚ noe verder oetbouwe….

Greuje nao volwassenheid.
 
De laevesvatbaarheid van de Jeugdraod woor aangetuendj. De tiëd waas aangebraoke om volwassen en ervare miense biej dees jeugdaktiviteit te betrikke. Gezoch waerdje nao emes dae zien hert aope gooje plaats haaj sjtaon väör de jeugd van Nunûm. De keus veel op Wiel van Bet (Wiel Joosten). Toen hae gevraogdj waerdje‚ waas hae metein enthousiast en väöl planne waerdje op de iërste kennismakingsaovendj gemaaktj. hiej ontsjtong ouch ´t plan om aan geldj te komme: organisere van kienaovendje. Henk Aelmans en Leon Gommans waerdje nao de middesjtandj in Haele gesjtuurdj väör ´t inzamele van prieze väor de iërste kienaovendj‚ waat ein kassucces waerdje. Dees aovendje waerdje nog diverse kiëre herhaoldj en gauw genog koste nuuj mantjels aangesjaftj waere. Samewerking mit Jeugdkarnavalsvereniginge van o.a. Haele‚ Naer en Roggel kwoom toet sjtandj. Via Jaq Pruisten van de Vreigeliërs höbbe wae mit häör ein samenwerking die nog sjteeds besjteit! Wiel van Bet en tante Ietje‚ haoje as pleegaojers de zake inne gate en doon det zeer bekwaam. Zoon Bair regelde de hoofdzake‚ mit sjteun van miense van ´t iërste oear zoeals Henk Aelmans‚ Leon Gommans en Ad Gijsen. Ger Rutten‚ Thei Bex‚ Paul Janssen en Dré Clement sjlaote zich hiej ouch biej aan. Sjteun krege zie weer biej tal van aktiviteite van Tjeu Clement‚ Harrie Roumen‚ Henk Janssen en Lei Janssen. In 1977 sjloog ´t succes vanne Jeugdraod äöver oppe maedjes: de iërste Maedjesraod onger aanveuring van Prinses Petra I is ein feit! De fundamenten vanne Jeugdkarnaval in Nunûm zeen gelag en kinne noeats miër verdwiene.

Aafsjiêd jeugdcarnavalsvereniging De Bosuulkes 1989.
 
Jeugd Prins Arno I zien aafsjiedswaord inne 8e editie van ´Ut Bosuulke´: Leef Bosuule en Bosuulinne‚ Nao ein prachtig karnavalsfiëst zeen dit mien litste wäördjes. Ich dink det wae truuk kinne kieke op eine sjoean gesjlaagdje vastelaovendj. Daoväör wil ich ederein bedanke dae det mäögelik haet gemaaktj. Oppe iërste plaats‚ mien aojers‚ want zonger häör hulp waas ´t niks gewaore. Mer ouch miene Raod van 11 en ´t besjtuur moog ich neet vergaete want die zeen onmisbaar gewaes. Verder alle Bosuule die mitgedaon höbbe aan alle aktiviteite die d´r wore. Jaomer genog höb ich vernaome det d´r dit jaor geine jeugdraod miër kumptj. Toch haop ich nog det d´r nog get geregeldj waertj. Den restj mich allein nog ederein sjoeane‚ plezerige daag te winse mit of zonger jeugdraod. Väöl plezeer!!! Alaaf!!!

Mit eine prins oet ein good hoês‚ blieftj nemes miër thoês!

Jeugdprins Arno I

Heroprichting jeugdcarnavalsvereniging 2009.
 
De sjläöteläöverdracht vanne gemeindje Luedaal in 2008 waerdje door de Carnavalsvereniginge vanne aoj gemeindje Haele georganiseerdj. De Sjaopsköp oet Häör‚ De Halve Gare oet Böggeme‚ de Vreigeliërs oet Haele en wae Bosuule belaefdje twië top-aovendje oppe donderig en vriejdig väöre Carnaval. D´r waas ein dink waat ein bietje pien deej aan ´t Bosuulehert: Luedaal‚ 16 dörpe‚ 15 jeugdraoje!! Allein de Bosuule oet Nunûm höbbe gein jeugdcarnavalsvereniging! Nao inventarisatie tiejens de Carnaval bleek d´r hiej en dao waal animo väör eine jeugdraod. In ´t naojaor van 2008 zeen d´r breefkes door ´t dörp gesjtuurdj om de jeugd te polse en det leverdje 15 enthousiaste reakties van kinjer op. Op 3 jannewari 2009 zeen we mit dees jonges en maedjes en häör‚ net zoea enthousiaste‚ aojers omme taofel gaon zitte en de heroprichting van de jeugdcarnavalsvereniging woor een feit. Jeugdprins Arno I‚ de langstzittendje jeugdprins van hiël Limburg en omsjtreke haet in 2009‚ zien 22e regeerjaor‚ eindelik de mach äövergedrage aan eine noewe jeugdprins van jeugdcarnavalsvereniging De Bosuulkes.
Belangriëk Bericht
't Programma väör 't seizoen 2017-2018 steit dr op!
Sjnel knuup
Litste Gastebook Bericht

Bosuulke Sjreef:

Er is ook een video opname van de optocht te vinden op youtube carnavalsoptocht nunhem 2017 


Antjwaord: Sjteit ouch oppe site onger menu knoep Video

Sjponsoren