Ontsjtaon vanne karneval
‘t Ontsjtaon vanne karneval in Nunûm.
Wae sjrieve ’t begin van ‘t jaor 1957 (karnevals zunjig waas det jaor op 3 miërt). Biej de femilie Aelmans, onger os gezag “biej Sjtienke”, kwome in dae tiëd väöl Nunûmmers biejein om get te aojhore en te kaarte. De femilie Aelmans woeandje toendertiëd biej ’t paedje langs de huidige gymzaal in Nunûm. Wie d’r gesjpraoke waerdje äöver ’t ophaoje vanne karneval in Haele, is d’r besjlaote om karnevalsmaonjdig eine optocht te haoje. D’r waerdje breefkes gemaaktj väör de optocht op maonjdig en dees waerdje op versjillendje elekriciteitspäöl opgehange.

Op eine zunjig waerdje nao aafloup van ein oetveuring van ’t Servaoskoear in ’t Servaoshoës eine President oetgerope. President Wiel I (Wiel vanne Pau) kwaam teväörsjien vanachter oppe buun, omgaeve door ’n paar Bosuule in häör sunjigse pak, mit ein zellefgemaaktj heutje. De naam Bosuule haje ze ouch biej Sjtienke bedacht: in dae tiëd loge de hoezer zoget ane bos vast en dao laefdje bosule det ’t barsdje. Ane angere kantj vanne brögk woea ’t landj get platter waas, dao woeandje de Buizerds, ouch dae naam sjprikt väör zich.

’s Maonjdigs leep de President inne optocht väörop mit eine toeter as scepter. Ziene mantjel waas door To, zien vrouw, gemaaktj van ein wit taofellake, äövertrokke mit aubergine kläörige veuringsziej en aafgezatte mit goudgalon. De prinsemuts waas van ein aoj soldaotemuts (sjeepkesmodel) gemaaktj; d’r waas eine kartonne puntj opgemaaktj en ’t gehiël äövertrokke mit dezelfdje veuringsziej. Achter de President leep “de Nunûmse fanfaar”. Hieväör waas biej Sjtienke aovendje geoefendj op zellufgemaaktje trompette van oranje karton van ’t Zäödje (Nunhems Zaden). De trompetters waerdje begeleidj door “de Witte van Bèrke” of “de dieke van Hoube” op eine aoje kleierkas. In deze optocht waas ouch eine groep die de begrafenis van “de Vreigeliërs” oetbeeldje; ein doeadskist mit eine houp zumpendje miense in ’t zjwart d’r langs. Vanaaf det jaor haet de karneval in Nunûm altiëd besjtange, toet noe toe.

Jaors drop waerdje Wiel van Bet oetgerope oppe sjpeelplaats vanne “Aoj Sjoeal” (noe: appartemente biej kefee Hoube). Nunûm haaj toen ziene iërste prins mit eine komplete Raod van 11. Onger angere: Wiel vanne Pau, Sjeng van Door, de Witte van Bex Tuem, Harrie van Wulmke, Bair vanne Prins, Jan vanne Vriet, Rieke vanne Post, Huub vanne Post, Jan van Bet (waem nog miër?), de prins haaj weer eine nuje mantjel en ein nuuj muts, de Raod waas geklidj in gael zieje haemdje, mit roeaj zieje bokse. De vrachtwage van ’t Zäödje waerdje gebroektj as prinsewage. In det jaor is ouch ’t bekindje leedje vanne Bosuule gemaaktj:
 
“De Bosuule zeen weer op gank, en haoje ouch van drank. Ze kieke neet nao eine cent, en zeen zoea gauw kontent. Falderie faldera falderahahahahaha, falderie faldera en zeen zoea gauw kontent.” 
Belangriëk Bericht
't Programma väör 't seizoen 2017-2018 steit dr op!
Sjnel knuup
Litste Gastebook Bericht

Bosuulke Sjreef:

Er is ook een video opname van de optocht te vinden op youtube carnavalsoptocht nunhem 2017 


Antjwaord: Sjteit ouch oppe site onger menu knoep Video

Sjponsoren